Skóli lífsins

Eitt af því sem ég hef lært undanfarna daga er að prentsverta er alveg vitabragðlaust fyrirbæri.

Næstum jafnbragðlaust og málflutningur Vökumanna - væri freistandi að halda áfram, en þar sem ég er með öllu ósofinn og erfiður ætla ég að berja pokann.

PS: Geir Ólafs minnir mig sífellt meira á Bob Goldthwait. Mér finnst það vægast sagt ónotalegt.

Pólitík?

Ég er á framboðslista Röskvu til Stúdentaráðs eins og einhverjir vita. Ég er hvergi nærri því að eiga möguleika á nokkurri mikilsverðri ábyrgðarstöðu eftir kosningar þar sem ég er í stuðningssæti á listanum, því sautjánda, en hins vegar dytti mér aldrei í hug að leggja nafn mitt við málstað sem ég styddi ekki heilshugar. Þess vegna finn ég mig knúinn til að tjá mig aðeins hérna. Kveikjan að þessum pistli er að mörgu leyti ágæt bloggfærsla Vökumannsins og öðlingspiltsins Þórðar Gunnarssonar. Doddi kemur með marga jákvæða punkta, segir að fylkingarnar eigi að vinna saman að hagsmunum stúdenta eins og þær frekast geta, hætta öllum óþarfa ýfingum og leita í sameiningu lausna við vandamálum. Góðar hugmyndir séu góðar hugmyndir sama hvaðan þær koma - sem er auðvitað alveg kórrétt. Þetta lítur vel út svona svart á hvítu og ó hvað maður gæfi ekki fyrir að allir gætu alltaf verið sammála um allt. Svo er hins vegar því miður ekki. Í pistli sínum segir Doddi:

"Stúdentaráð á [...] ekki að eyða tíma sínum í að álykta um hin ýmsu deiluefni sem kunna að vera til staðar í þjóðfélaginu. Þá verður ráðið einfaldlega að pólítískum þrýstihópi sem [er] ekki það sem við viljum."

Hér er það sem Dodda skrikar fótur, hann fer út af sporinu og lendir á andlitinu í skurði fullum af mold og grjóti. Stúdentaráð á nefnilega einmitt að vera pólitískur þrýstihópur sem þrýstir án afláts á stjórnvöld að bæta hag stúdenta og gefst aldrei upp. Ef Stúdentaráð gerir það ekki þá gerir það enginn. Ef Stúdentaráð á að þjóna hagsmunum stúdenta eins og því er ætlað að gera þá verður það líka vera tilbúið að álykta um eldfim pólitísk mál sem snerta hagsmuni stúdenta við Háskóla Íslands með beinum hætti. Aðeins þannig getur það endurheimt stöðu sína sem eitt öflugasta hagsmunafélag landsins. Það er þó ekki þar með sagt að Stúdentaráð eigi aldrei að gera neitt annað - að sjálfsögðu þarf líka að huga að smærri málum sem hugsanlega eru alls ekkert viðkvæm og auðvelt er að hrinda í framkvæmd án umtalsverðar utanaðkomandi aðstoðar. Það er heldur ekki þar með sagt að Stúdentaráð eigi að taka eindregna (eða yfirleitt nokkra) afstöðu til allra hugsanlegra pólitískra þrætuepla. Það er til dæmis ekki í verkahring Stúdentaráðs að álykta um aðildarumsókn Íslands að Öryggisráði Sameinuðu þjóðanna - það sér hver maður. Hins vegar liggur auðvitað alveg beint við að Stúdentaráð - sem málsvari stúdenta við Háskóla Íslands - taki afstöðu til mála sem varða hagsmuni nemenda við skólann umfram aðra þegna þjóðfélagsins, og þá á einu að gilda hversu "pólitísk" eða "eldfim" einhverjum kann að þykja þau.

Það sem eflaust er Vökuliðum einna efst í huga þegar þeir tjá sig á þessum nótum er hið umtalaða Vatnsmýrarmál, sem var áberandi í umræðunni síðasta haust. Í sem stystu máli voru málavextir þessir: Fulltrúi Röskvu í Stúdentaráði lagði fram þá tillögu að Stúdentaráð myndi álykta með brotthvarfi Reykjavíkurflugvallar úr Vatnsmýrinni og að Háskóla Íslands yrði þar tryggt byggingarland undir stúdentaíbúðir og kennsluaðstöðu. Þessi krafa er í hæsta máta eðlileg þar sem það er borðleggjandi að öllum stúdentum framtíðar yrði hagur í því að háskólasvæðið stækkaði og efldist, og liggur beint við að Vatnsmýrin yrði nýtt frekar til þess, enda önnur svæði vart tiltæk í nágrenninu. Nú þegar er skortur á hagkvæmu húsnæði handa stúdentum og það er erfitt að gera sér í hugarlund hvernig ástandið verður innan fáeinna ára þegar nemendum við skólann hefur fjölgað enn meira, eins og búist er við (og vonast er til). Af nákvæmlega sömu ástæðu og við viljum tryggja stúdentum hagstæð lánakjör þá finnst okkur mikilvægt að tryggja stúdentum hagstæð búsetukjör. Það sama má segja um alla aðra aðstöðu við skólann, hvort sem er til kennslu eða lestrar, en hún er vægast sagt fjarri því sem við myndum helst óska. Til að gera langa sögu stutta þá felldi meirihluti Vöku og Háskólalistans í Stúdentaráði tillögu Röskvu á þeirri forsendu einni að málið þótti of "pólitískt" til að álykta mætti um það á þessum vettvangi, þrátt fyrir að almenn samstaða hefði verið um málefnið sem slíkt. Má þá kannski líta svo á að meðlimir Vöku og H-listans hafi kosið gegn eigin sannfæringu?

Það sem meirihluti Stúdentaráðs virðist einfaldlega ekki átta sig á er að öll þau baráttumál stúdenta sem mestu máli skipta eru hápólitísk og hafa alltaf verið. Má ekki álykta gegn skólagjöldum næst vegna þess að það ríkir ekki um þau þverpólitísk samstaða á landsvísu? Má ekki krefjast aukinna fjárveitinga? Er sú krafa of pólitísk? Ef hugmyndin er að Stúdentaráð vinni eftir þeirri reglu að engan megi styggja og að aldrei megi nokkurn tíma vera í andstöðu við neinn þá held ég að réttast væri að kyssa réttindabaráttu stúdenta bless og fara heim að leggja sig. Yfir slíku er engin ástæða að vaka.

Hundakúnstir

Uss. Þriðji hundurinn farinn á innan við fjórum árum. Það gengur skuggalega hratt á þetta.

Endilega skoðið ægifagra framboðslista Röskvu til stúdenta- og háskólaráðs. Ég treysti því að allir sem vettlingi geta valdið mæti á kjörstað 8. eða 9. næsta mánaðar og greiði atkvæði eina rökrétta valkostinum í stöðunni.

Segið mér svo eitthvað fyndið eða skemmtilegt.

Frontin!

Man einhver eftir því þegar Krummi Björgvins var svaka harður gaur með rasssítt hár í leðurbuxum og leit út eins og heróínsjúklingur, alltaf geggjað trylltur, ber að ofan og óþarflega áleitinn við míkrófónstandinn sinn? Síðast þegar sást til hans var hann kominn með litaða emóhárgreiðslu og týpugleraugu og kenndi fólki brosandi að hafa til staðgóðan morgunverð í dagblaðsgrein. Hvað er það?

Í kvöld sá ég Sigurlaugu Gísladóttur og Sunnu Ingólfsdóttur ásamt hljómsveitinni Llama trylla lýðinn á einhverjum bestu tónleikum sem ég hef séð í lengri tíma. Ég held að meint koníaksstofa Pravda hafi aldrei verið svona troðin - hvað þá svona fönking fersk!

Afgreiðsla

Ég nenni eiginlega ekki að blogga um DV. Ég þarf samt að létta á mér:

-Mér finnst ekkert athugavert við það að miðill í ætt við DV finnist á íslenskum fjölmiðlamarkaði.
-DV var (og verður kannski áfram) kleprasnepill sem fókuseraði meira á shock-value en fréttaflutning.
-Ég var DV-megin í farsa undanfarinna daga og datt ekki í hug að rita nafn mitt á þennan guðsvolaða lista. Það er margt athugavert við DV - og þá aðallega framsetningu frétta - en þeir myrtu ekki Gísla Hjartarson. Þessar nornaveiðar voru fyrir neðan allt og nánast allir sem tjáðu sig um málið fóru offari. Það var helst Karl Th. Birgisson sem hélt einhverjum votti af skynsemi.
-Það skal enginn segja mér að það hafi verið einhliða ákvörðun Jónasar og Mikaels að segja upp störfum. Þarna voru einhverjir fitugri fingur á taumunum og það er mun alvarlegra mál en sá fréttaflutningur sem tíðkaðist á DV.
-Ég fæ ekki skilið hvernig ætlunin er að breyta þessu blaði til betri vegar en halda samt í menn eins og Eirík Jónsson og Jakob Bjarnar Grétarsson.

Mér er það lífsins ómögulegt að hnoða saman einhverjum lista yfir það hverjar þeirra 53 kvikmynda sem ég sá í bíó í fyrra hafi borið af. Þess vegna ætla ég að vísa ykkur beina leið á listann hans Krumma, sem er hvort eð er mikið betri en sá sem ég hefði gert.
Í fyrra gerði ég lista yfir þær kvikmyndir sem ég hlakkaði hvað mest til að sjá á nýju ári. Ég er að spá í að gera það aftur. Á listanum eru myndir sem hafa áætlaðan útgáfudag árið 2006 í Bandaríkjunum eða árið 2005 og hafa ekki enn verið teknar til sýninga hér. Þetta gæti líka þýtt að myndir sem komast á þennan lista verði ekki sýndar á Íslandi fyrr en árið 2007, eða jafnvel síðar. Þetta gæti orðið langt...

Fyrst koma þær tuttugu myndir sem ég bíð hvað spenntastur eftir:

20. Miami Vice
Michael Mann í Miami, með Colin Farrell og Jamie Foxx eitursvala, ekki í eitísjakkafötum, en í jakkafötum þó. Mann kann að setja söbstans í stílinn sinn, eitthvað sem margir mættu temja sér.

19. Sin City 2
Sin City var flott mynd - algjör rússíbani og stjórnlaust fjör - en hún virkaði samt meira á mig eins og frábær sjónvarpsþáttur en heilsteypt kvikmynd. Það dró svosem ekkert úr ánægjunni, en mér fannst eitthvað pínulítið snubbótt við hana. Það breytir því ekki að ég get ekki beðið eftir framhaldinu, hverjir sem koma til með að leika í því.

18. Shoot 'Em Up
Þetta verður eitthvað tryllt. Í stuttu máli er konseptið þetta: Clive Owen tekur á móti barni í miðjum skotbardaga og þarf síðan að vernda það fyrir morðóðum vígamönnum. Afgangurinn af myndinni verður að mestu hann í byssubardögum við mest extrím aðstæður sem hægt er að hugsa sér. Það er ekki annað hægt að bíða spenntur eftir útkomunni.

17. Youth Without Youth
Fyrsta mynd Francis Ford Coppola í níu ár og í þetta skiptið ætlar hann að tækla bíódramað með - vertu tilbúinn - Tim Roth og Bruno Ganz í aðalhlutverkum. Ég veit ekki alveg hvað er í gangi en eitthvað er það og ég vil kynnast því.

16. All the King's Men
Þetta er endurgerð á samnefndri mynd frá 1959 og þó að ég bókstaflega hati síðustu mynd Steves Zaillians, A Civil Action, þá er leikaraliðið hér bara of gott til að hægt sé að líta framhjá því. Sean Penn, Jude Law, Mark Ruffalo, Kate Winslet, Anthony Hopkins og James Gandolfini. Sony ætlaði að hefja sýningar á henni núna í nýliðnum desember en þeir vildu fikta eitthvað í henni á síðustu metrunum og af því að myndin þykir svo óskarsvæn var ákveðið að fresta henni um heilt ár, fram í desember á þessu ári. Hlýtur að vera vit í þessu.

15. Children of Men
Alfonso Cuarón veit hvað hann er að gera. Ef hann fær skáldsögu eftir P.D. James upp í hendurnar og Clive Owen, Charlie Hunnam og Julianne Moore til að stýra þá held ég að það þurfi eitthvað mikið að gerast til að það klikki.

14. Pirates of the Caribbean: Dead Man's Chest
Pirates of the Caribbean var besta skemmtun ársins 2003. Ég mundi fara á átta tíma einleik með Johnny Depp sem Jack Sparrow. Það skiptir í rauninni engu máli hvað Gore Verbinski gerir - ef hann hefur Johnny Depp og böns of monní þá getur ekkert komið út úr því nema gleði.

13. Match Point
Því meira sem ég heyri um þessa mynd eftir Woody Allen þeim mun áfjáðari verð ég í að sjá hana. Fólk kallar þetta meistaraverk og bestu mynd Allens síðan hann gerði Manhattan fyrir 27 árum. Gamanmynd? Spennumynd? Drama? Ég veit það ekki, og mér er í rauninni alveg sama.

12. Talladega Nights: The Ballad of Ricky Bobby
Will Ferrell og Adam McKay snúa bökum saman á ný og þeir sem hafa séð Anchorman vita að það eru góðar fréttir. Í þetta skipti bregður Ferrell sér í hlutverk Nascarkeppanda, væntanlega með hlægilegum afleiðingum. John C. Reilly leikur aðstoðarmanninn hans og Sacha Baron Cohen leikur illa franska keppinautinn. Þetta verður alltaf fyndið.

11. The Prestige
Christopher Nolan tekur sér frí frá Batman en kippir Christian Bale með sér í fríið og skellir honum í annað aðalhlutverkið í þessari, á móti úlfynjunni Hugh Jackman. Þeir leika galdramenn sem kljást hatrammlega um aldamótin 1900 með óþægilegum afleiðingum. Hertoginn sjálfur, David Bowie, fer með hlutverk Nikola Tesla og Michael Caine og Scarlett Johansson loka leikarahringnum. Nolan hefur enn ekki misstigið sig og ég get ekki séð ástæðu fyrir því að það ætti að breytast.

10. The Assassination of Jesse James by the Coward Robert Ford
Óþjálasta nafn allra tíma...en verður vonandi hörkumynd. Andrew Dominik, sem gerði Chopper með Eric Bana á sínum tíma, leikstýrir Brad Pitt í hlutverki útlagans Jesse James og Casey Affleck í hlutverki Roberts Ford. Svo er Sam Rockwell þarna líka einhvers staðar. Þetta verður hart.

9. The Departed
Ég lít jákvæðum augum á þetta DeNíróska ástfóstur sem Martin Scorcese hefur tekið við Leonardo DiCaprio. DiCaprio er bara svo góður leikari. Gangs of New York var góð (víst var hún góð), Aviator var góð og þessi verður góð. Ég meina, þess hefur verið beðið í 35 ár að Scorcese leikstýri Jack Nicholson. Nú gerist það. Kryddið með Matt Damon, Mark Wahlberg, Alec Baldwin, Martin Sheen og handriti sem William Monahan, einn eftirsóttasti handritshöfundur samtímans, vann upp úr marglofaðri kínverskri mynd og þá fáiði eitthvað mjög gott, ég trúi ekki öðru.

8. Babel
Amores Perros var góð, 21 Grams var betri og nú er bara að vona að Babel toppi þær báðar. Alejandro González Iñárritu heldur áfram á sömu braut með þrískiptu grúppurómönuna, í þetta sinn með Brad Pitt, Cate Blanchett og Gael Garcia Bernal í aðalhlutverkum. Hvert öðru betri leikarar og öruggur sigur nema Iñárritu fari að fikta um of með formið.

7. There Will Be Blood
Það er afskaplega bjartsýnt að setja þessa næstu mynd Pauls Thomas Anderson (Hard Eight, Boogie Nights, Magnolia, Punch-Drunk Love) á þennan lista vegna þess að sennilega mun hún ekkert koma út á þessu ári.Ég ætla þó að halda í vonina. Það hafa verið uppi sögusagnir um að hann ætli að fá Daniel Day Lewis í aðalhlutverkið, sem væri auðvitað guðdómlegt, og líklega má búast við fastagestum eins og Philip Seymour Hoffman, John C. Reilly og Philip Baker Hall þarna líka. Þessi mun fjalla um vafasöm olíuviðskipti í miðausturlöndum. Snilld, hvernig sem fer.

6. V for Vendetta
Ég hef heyrt of góða hluti um þessa mynd til að vera ekki losandi hland í þessum skrifuðu orðum. Wachowski bræður ýjuðu að því að þeir væri talentlausir með Matrix-framhöldunum en ef marka má umfjöllun sem V for Vendetta hefur fengið þá munu þeir svo sannarlega hljóta uppreisn æru í ár. Þessi er byggð á átján ára gamalli myndasögu sem ég ætla ekki að þykjast þekkja - en áleitnin er víst ofboðsleg og fólk er þegar farið að tala um þessa mynd sem þá mikilvægustu sem koma mun út í ár.

5. Stranger Than Fiction
Ókei. Marc Forster (Monster's Ball, Finding Neverland) leikstýrir Will Ferrell í mynd um mann sem einn daginn byrjar að heyra narrasjón af eigin lífi í höfðinu á sér. Handritshöfundurinn, Zach Helm, þykir eitthvert prodigískt viðundur og það er þegar farið að nota þetta handrit við kennslu í kvikmyndaskólum vestra. Emma Thompson, Maggie Gyllenhaal, Dustin Hoffman, og Tony Hale (Buster í Arrested Development) eru meðal annarra leikara.

4. München
Ég neita að kalla þessa mynd Munich...hún heitir eftir borginni München sem heitir bara München, og hananú. Mér er alveg sama þótt München hafi ekki fengið jákvæðar viðtökur hjá öllum í heiminum. Allir gagnrýnendur aintitcool.com, Harry, Moriarty, Quint, Massawyrm og Capone kalla þessa mynd meistaraverk, eina allra bestu mynd Spielbergs og eina bestu mynd síðasta árs. Roger Ebert gefur fjórar stjörnur af fjórum og kallar myndina eina bestu mynd Spielbergs. James Berardinelli gefur fjórar af fjórum og kallar eina bestu mynd Spielbergs. Kirk Honeycutt gefur A. Ég vil sjá þetta núna.

3. Southland Tales
Enn bíða allir eftir því að sjá hvernig Richard Kelly ætlar að fylgja Donnie Darko eftir. Þessi mynd var á listanum mínum í fyrra og er þar enn. Leikaraliðið er fuuuuurðulegt. Kletturinn sem minnislaus hasarmyndahetja, Sean William Scott sem hjólalögga (og tvíburi), Sarah Michelle Gellar sem klámstjarna, og þar að auki Mandy Moore, Justin Timberlake, Christopher Lambert, Jon Lovitz, Janeane Garofalo og Kevin Smith sem lappalaus stríðkempa í hjólastól. Plottið er enn að mestu á huldu en ég hef enga trú á öðru en Richard Kelly hafi gert eitthvað frekar öflugt úr þessu.

2. Zodiac
Já, David Fincher mun sanna það fyrir heiminum í ár að hann getur betur en Panic Room. Jake Gyllenhaal, Mark Ruffalo og Robert Downey Jr. leika aðalhlutverkin í þessum glæpatrylli um einhvern óttaðasta raðmorðingja í sögu Bandaríkjanna. Í rauninni er ekkert meira um að það að segja. Svo bíður maður bara eftir Benjamin Button á næsta ári, með Brad Pitt og Cate Blanchett (eru þau samvaxin?).

1. The Fountain
Þessi var líka á listanum mínum í fyrra og hún fer sko ekki fet. Gerist á þrjúþúsund ára tímabili og fjallar um leit að eilífu lífi. Hugh Jackman og Rachel Weisz hafa líklega rúllað þessu upp (þau tóku við af síamstvíburunum Brad Pitt og Cate Blanchett). Darren Aronofsky er einn af snillingum okkar tíma og með þessari mynd ætlar hann að taka af allan vafa um það. Sjáið til.

Hér eru fleiri myndir sem ég hlakka til að sjá en náðu ekki inn á listann:

300
Fornsaga í leikstjórn Zacks Snyder (Dawn of the Dead endurgerðin) gerð eftir myndasögu Franks Miller (Sin City). Hljómar spennó.

Arthur & the Minimoys
Þetta lítur út eins og eitthvað spaug. Luc Besson leikstýrir Freddie Highmore í hlutverki stráks í fjársjóðsleit sem ráfar inn í ævintýraland þar sem hann finnur pínkuponsulítið fólk sem talsett er af David Bowie, Snoop og Madonnu. Ég veit a.m.k. að ég mun sjá þetta.

The Black Dahlia
Brian DePalma er sorglega mistækur leikstjóri en þessi noir-mynd gerð eftir bók James Ellroy (L.A. Confidential) lofar góðu. Josh Hartnett, Scarlett Johansson og Hilary Swank leika.

Brokeback Mountain
Það er búið að lofa þessa mynd of mikið til að maður hlakki ekki til hennar. Hommakúrekar í sveitinni. Örugglega ægilega hugljúft og erfitt. Fær sennilega óskar sem besta mynd í ár.

Capote
Ég vil sjá Philip Seymour Hoffman. Held að þessi mynd sé í raun ekki mikið annað en hans frammistaða. Ætli það megi ekki kalla það nokk ljóst að hann fái óskarinn.

Deja Vu
Tony Scott og Denzel gera bara svalt dót. Nú er tímaflakk í spilinu. Ég sé fram á harðan, svipbrigðalausan en jafnframt ringlaðan Denzel með nóg af látum og athyglisbresti, hröðum klippingum og of háum kontrast.

The Fantastic Mr. Fox
Wes Anderson er séní á allan hugsanlegan máta. Nú ætlar hann að vinna úr barnabók Roalds Dahl og ég gæti ekki verið ánægðari.

Flushed Away
Liðið á bakvið Wallace & Gromit gerir mynd um rottu í stórborginni. Með talsetningu fara Hugh Jackman, Kate Winslet, Ian McKellen, Andy Serkis, Bill Nighy og Jean Reno, meðal annarra. Verður örugglega ferskt.

The Good German
Leikstjórinn er Steven Soderbergh, sögusviðið er Berlín á eftirstríðsárunum og leikarar eru George Clooney, Cate Blanchett, Tobey McGuire og Beau Bridges. Gæti brugðið til beggja vona, en ég hef trú á Soderbergh, af einhverri undarlegri ástæðu.

Good Night, and Good Luck
Þessi var nálægt því að komast á topp tuttugu. Clooney leikstýrir pólitískri ádeilu sem er örugg með býsn af óskarstilnefningum. Svarthvítt og kósí.

The Good Shepherd
Fyrsta leikstjórnarverkefni Robert DeNiro í tólf ár. Hann rekur sögu CIA og leikur sjálfur ásamt Matt Damon, Angelinu Jolie, Joe Pesci, Alec Baldwin, Billy Crudup, John Turturro, William Hurt, Michael Gambon og Jason Patric. Ekki slæmt.

Grind House
Þessi slapp nánast inn á listann. Tarantino og Robert Rodriguez gera tvískipta hrollvekju sem eflaust verður fyndin og ógeðsleg og hvaðeina sem þeim dettur í hug.

Idiocracy
Mike Judge hefur ekkert gert síðan hann gerði Office Space fyrir átta árum. Nú er á leiðinni mynd eftir hann með Luke Wilson í aðalhlutverki. Wilson leikur mann sem er frystur og vaknar árið 3001 þegar mannkynið hefur forheimskast og siðmenningin er dauð. Ég sá óskaplega jákvæðan dóm um handritið einhvers staðar.

Inland Empire
David Lynch. Þarf að segja meira? Hann hefur fengið sína gömlu samstarfsvinkonu Lauru Dern aftur til liðs við sig. Sjáum hvað hann gerir.

Inside Man
Það munaði ekki miklu að þessi færi á listann. Spike Lee leikstýrir Denzel, Clive Owen og Jodie Foster í mynd um misheppnað bankarán sem endar með gíslatöku. Hilarity ensues (eða er það ekki?)

Jarhead
Nýja myndin hans Sam Mendes (American Beauty, Road to Perdition) sem verður frumsýnd hér á landi hvað á hverju. Hún hefur ekki fengið neina rífandi dóma en mig dauðlangar samt að sjá hana. Jake Gyllenhaal, Jamie Foxx, Chris Cooper og Peter Sarsgård eru flottur pakki.

Lucky You
Curtis Hanson (L.A. Confidential, Wonder Boys, 8 Mile) leikstýrir Eric Bana og Drew Barrymore í mynd um pókerspilara í Vegas. Hljómar ágætlega.

Master of Space & Time
Michel Gondry gerði bestu mynd ársins 2004, Eternal Sunshine of the Spotless Mind, og ætlar nú að fríka út með meistara útfríksins, Jack Black, í mynd sem fjallar um vísindamenn sem uppgötva leið til að stjórna raunveruleikanum.

Pan's Labyrinth
Ný hryllingsfantasía frá Guillermo del Toro (Hellboy) á spænsku. Það sem ég hef séð úr þessari mynd er bara svo flott að ég verð að sjá meira.

Science of Sleep
Önnur mynd frá Michel Gondry. Hér leikstýrir hann Gael Garcia Bernal í mynd um drauma og undirmeðvitund, sem virðist vera honum svo ósköp hugleikin.

Scoop
Woody Allen hefur fengið eintómt lof fyrir Match Point og í Scoop endurnýjar hann kynnin við Scarlett Johansson en lætur hana núna eiga í ástarsambandi við Hugh Jackman. Ef hann heldur dampi þá verður þetta mjög gott.

Smokin' Aces
Joe Carnahan tókst frábærlega upp með Narc árið 2004 og nú er að sjá hvað hann gerir við þetta verkefni. Leikaraliðið er vafasamt; Ben Affleck, Andy Garcia, Ryan Reynolds, Jeremy Piven og Alicia Keys en Don Cheadle, Ray Liotta og Jason Bateman geta kannski bjargað því og gert almennilegheit úr þessu.

Sunshine
Danny Boyle er á miklu flugi og þetta sólarferðalag hans með Cillian Murphy í fararbroddi lofar góðu. Svo þarf ég bara að sjá Millions, sem mér skilst að sé dúndurflott.

Syriana
Stephen Gaghan, handritshöfundur Traffic, leikstýrir hér George Clooney, Chris Cooper, Matt Damon og fleirum í hápólitískri ádeilu á olíuiðnaðinn í miðausturlöndum (er P.T. Anderson of seinn?). Ég hef gaman af svona.

The Visiting
Nú er Oliver Hirschbiegel (Der Untergang) mættur í land tækifæranna. Hans fyrsta verkefni verður að leikstýra Nicole Kidman og Daniel Craig í einhverskonar geimveru-sálfræðitrylli. Er það ekki alltaf fjör?

Walk the Line
Skilst að Joaquin Phoenix og Reese Witherspoon séu yfirgengilega góð - syngja meira að segja sjálf. Það er í sjálfu sér alveg næg ástæða til að vera spenntur. Ég held að sagan sé ekki sérlega rismikil.

The Weather Man
Gore Verbinski kúplar sig út úr tæknibrellunum og látunum í örskotsstundu og leikstýrir Nicholas Cage í þunglyndislegri mynd um veðurfræðing sem neyðist til að taka afstöðu til lífsins. Hefur fengið flotta dóma.

Hér eru svo að síðustu myndir mig langar að sjá en er samt smeykur um að verði einhverkonar dísaster:

16 Blocks
Bruce Willis með mústasj í löggubúningi og Mos Def sem vitni í handjárnum þurfa að komast í gegnum hostílt glæponahverfi. Það reynist örðugt. Hér gæti margt farið úrskeiðis enda Richard Donner ekki gert góða mynd í sautján ár.

Apocalypto
Mel Gibson er búinn að tapa glórunni. Mynd um Maya á indíánamáli. Gæti orðið áhugavert, gæti líka orðið viðurstyggilega leiðinlegt.

Ask the Dust
Robert Towne er snillingur. Hann skrifaði handritið að Chinatown og fyrir það verður hann alltaf í guðatölu. En þessi mynd sem hann er með í burðarliðnum hljómar bara eins og eintóm leiðindi. Gerist í Suður-Ameríku á krepputímanum og skartar Sölmu Hayek og Colin Farrell í aðalhlutverkum. Ég er voða smeykur um að þetta verði bara Hús andanna 2.

Bobby
Emilio Estevez er mættur aftur til leiks og er búinn að sanka að sér risastórum leikarahóp, sem inniheldur burn-out, meistara og poppara, fyrir þessa mynd. Hann er með pabba gamla, Martin Sheen, Demi Moore, Sharon Stone, Helen Hunt, Christian Slater, Heather Graham, William H. Macy, Laurence Fishburne, Shia LeBouf, Lindsay Lohan, Mandy Moore, Anthony Hopkins, Mos Def og Elijah Woods, að ógleymdum Harry Belafonte. Myndin fjallar um fólk á hótelinu þar sem Robert Kennedy var skotinn. Hljómar ekkert of spennandi...en við skulum sjá hvort Estevez hefur einhverja hæfileika eftir allt saman.

Casino Royale
James Bond hefur ekki verið skemmtilegur síðan einhvern tíma á síðustu öld, og vel það. Það voru banal mistök að ráða ekki Tarantino til að lífga þennan varning við. Ég meina, er það ekki ágætt hint að ENGIN leikkona er til í að taka að sér hlutverk Bondstúlkunnar og að þeir þurftu að leita í fleiri ár að leikara þangað til einhver var til í tuskið? Að því sögðu þá fíla ég Daniel Craig mjög vel...

Da Vinci Code
Mér fannst þessi bók ómerkileg. Ég hefði allt eins getað fengið allar þessar samsæriskenningar á þremur útprentuðum A4 blaðsíðum og skemmt mér jafnvel...Dan Brown er ekki rithöfundur fyrir fimmaur. Auk þess þoli ég ekki Ron Howard - að Arrested Development narrasjóninni undanskilinni hefur hann ekkert gert af viti síðan The Paper fyrir ellefu árum.
Hins vegar held ég að þessi saga henti ótrúlega vel sem kvikmynd - enda á köflum skrifuð eins og kvikmyndahandrit - og mér finnst líka magnað hvað þeim tókst að draga mikið úr asnalegheitum Toms Hanks. Svo er Audrey Tautou líka sæt.

Flags of Our Fathers
Ég ætti að vera helspenntur fyrir þessari mynd en það er bara eitthvað fráhrindandi við þá staðreynd að myndir séu að miklu leyti teknar á Íslandi. Ég veit ekki hvað það er.

Hail Caesar
Hvað eru Coen-bræður að gera þessa dagana? Ladykillers og Intolerable Cruelty eru fyrstu skrefin í átt að ferilsmorði og ég vona að þeir reddi sér með þessari. Ég er samt ekkert of bjartsýnn.

Lady in the Water
Ætli Shayamalan takist að reka af sér slyðruorðið eftir Village, sem mæltist nú ekki svo vel fyrir hjá gagnrýnendum, eða almenningi? Ég vona það, því ég nenni ekki að sjá hann draga Paul Giamatti með sér í einhverja vitleysu.

Mission: Impossible III
Ef þeir sleppa grímufarsanum úr síðustu mynd þá gæti þetta sloppið. Philip Seymour Hoffman ætti að geta verið ógeðslegur vondur gæi. Trailerinn er hins vegar almennt slakur.

Poseidon
Wolfgang Petersen endurgerir mynd frá 1972 með Kurt Russell og Richard Dreyfuss. Haha. Mig grunar að þetta verði bara vond Titanic. En maður skal þó aldrei segja aldrei. Kannski verður eitthvað vit í þessu. Maður má ekki gleyma því að Petersen er maðurinn sem gerði Das Boot.

Revolver
Fólk hefur hatað á þessa mynd og kallað hana óskiljanlega þvælu, sagt Guy Ritchie vera búinn að missa það og Madonnu vera ógeðslega. Ég ætla að gefa Revolver séns. Ég held að það komi nefnilega alveg til greina að fólk bara nái henni ekki.

A Scanner Darkly
Keanu Reeves er óþolandi. Richard Linklater er erfiður. Ég vona að þeim takist að kýla saman einhverja snilld í teiknimyndaprógramminu sínu. Annars er illa farið með Philip K. Dick.

Superman Returns
Trailerinn fyrir þessa mynd er glataður. Superman er leiðinleg persóna. Það mun koma mér á óvart ef ég fíla þetta og ég veit að það verður þá bara Kevin Spacey að þakka.

World Trade Center (ekki nefnd enn)
Mér finnst ekkert of snemmt fyrir Oliver Stone að tækla ellefta september. Ég er bara efins um að hann eigi eftir að gera það almennilega. Ég held að það sé of mikið magn fíkniefna í líkamanum á honum til að hann geti hugsað skýrt. Við fáum bara einhverja nakta indíana á Ground Zero.

X-Men 3
Ég sá auglýsingu fyrir þessa mynd í bíó áður en það var búið að ákveða hver ætti að leikstýra henni. Það var ekki einu sinni búið að skrifa handritið. Ég er ekki einu sinni viss um að það hafi verið búið að ákveða hver ætti að skrifa handritið. En Brett Ratner er...Brett Ratner. Nýju karakterarnir lúkka ágætlega en það er ekki þar með sagt að Ratner geti gert eitthvað af viti við þá. Mér fannst þetta líka verið orðið frekar útþynnt í síkvelnum (já, mér fannst númer eitt betri, só sú mí).


Hana.

Getraun

Hver orti eftirfarandi?

Í stólpagráðum verður þrautin þrengst
með þverhnípt skap og höfugt rænuleysi,
því hvar sem andinn byggir haflegt hreysi
mun hjartatetur kúgast allra lengst.
Á meðan hrönn á nollurs neggi brýtur
og nisting slær á svalan báruskafl
er stefjum hætt, uns stundarkornið þrýtur
og stríðið hefst við innsta sálargafl.

Reynið ykkur á þessu.

Ég bara spyr

Var leirrennsla einhvern tíma það algengt áhugamál að það verðskuldaði leir-upp-um-alla-veggi-mistakasenu í annarri hverri teiknimynd?